ਆਤਮ ਰਸ

ਸਰੀਰ ਨੂੰ ਭੁੱਖ ਹੈ, ਅੰਨ ਦੀ। ਸਰੀਰ ਦੇ ਅੰਦਰ ਜੋ ਮਨ ਰਹਿੰਦਾ ਹੈ, ਉਸ ਨੂੰ ਭੁੱਖ ਹੈ ਵਿਚਾਰ ਦੀ ।

ਇਸੇ ਸਰੀਰ ਵਿੱਚ ਜੋ ਆਤਮਾ ਹੈ, ਉਸ ਨੂੰ ਭੁੱਖ ਹੈ, ਨਿਰੰਕਾਰ ਦੀ । ਜੇ ਸਰੀਰ ਨੂੰ ਆਹਾਰ ਨਾ ਮਿਲੇ ਸਰੀਰ ਮਰ ਜਾਏਗਾ, ਸਰੀਰ ਦੀ ਮੌਤ ਹੋ ਜਾਏਗੀ ।

ਮਨ ਨੂੰ ਵਿਚਾਰ ਨਾ ਮਿਲਣ, ਮਨ ਦੀ ਮੌਤ ਹੋ ਜਾਏਗੀ । ਇੰਝ ਹੀ ਆਤਮਾ ਨੂੰ ਨਿਰੰਕਾਰ ਨਾ ਮਿਲੇ ਤਾਂ ਆਤਮਾ ਦੀ ਮੌਤ ਹੈ ।

ਸਰੀਰ ਆਹਾਰ ਕਰਕੇ ਜਿਉਂਦਾ ਹੈ । ਆਹਾਰ ਸ਼ੁੱਧ ਹੋਣਾ ਚਾਹੀਦਾ ਹੈ ।ਜੇ ਸਰੀਰ ਨੂੰ ਸ਼ੁੱਧ ਆਹਾਰ ਮਿਲੇ, ਸਰੀਰ ਤੰਦਰੁਸਤ ਰਹੇਗਾ । ਮਨ ਨੂੰ ਵਿਚਾਰ ਵੀ ਸ਼ੁੱਧ ਚਾਹੀਦੇ ਹਨ ।

ਜੇ ਮਨ ਦੇ ਵਿਚਾਰ ਸ਼ੁੱਧ ਹੋਣਗੇ ਤਾਂ ਮਨ ਵੀ ਸ਼ੁੱਧ ਹੋਵੇਗਾ, ਨਿਰਮਲ ਹੋਏਗਾ । ਆਤਮਾ ਨੂੰ ਵੀ ਆਤਮ ਰਸ ਚਾਹੀਦਾ ਹੈ । ਹਰਿ ਰਸ ਚਾਹੀਦਾ ਹੈ ।

ਜੇ ਤੇਰਾ ਮਨ ਸ਼ੁੱਧ ਹੋ ਜਾਏ ਤਾਂ ਤੇਰਾ ਆਹਾਰ ਵੀ ਸ਼ੁੱਧ ਹੋ ਜਾਇਗਾ ,ਤੇਰਾ ਕਿਰਦਾਰ ਵੀ ਅਤੇ ਤੇਰੇ ਵਿਚਾਰ ਵੀ । ਸ਼ੁੱਧ ਮਨ ਵਾਲੇ ਦਾ ਆਹਾਰ ਵੀ ਸ਼ੁੱਧ ਹੋਏਗਾ , ਪਵਿੱਤਰ ਹੋਵੇਗਾ ਅਤੇ ਵਿਚਾਰ ਵੀ ਪਵਿੱਤਰ ਹੋਣਗੇ ।

“ਸੋ ਪੰਡਿਤ ਜੋ ਮਨੁ ਪਰਬੋਧੈ ਰਾਮ ਨਾਮੁ ਆਤਮ ਮਹਿ ਸੋਧੈ ॥”