“ਇਮਾਨਦਾਰੀ ਦੀ ਦੁਕਾਨ”

ਇਹ ਬੋਰਡ ਪਿੰਡ ਰਾਜੇਵਾਲ ਦੇ ਭਗਤ ਪੂਰਨ ਸਿੰਘ ਮੈਮੋਰੀਅਲ ਸਕੂਲ ਦੇ ਵਿੱਚ ਲੱਗਿਆ ਹੋਇਆ ਹੈ। ਇਸ ਸਕੂਲ ਵਿੱਚ ਇੱਕ ਬਹੁਤ ਹੀ ਨਿਵੇਕਲਾ ਤੇ ਖ਼ੂਬਸੂਰਤ ਉਪਰਾਲਾ ਕੀਤਾ ਗਿਆ ਹੈ। ਇਸ ਸਕੂਲ ਦੇ ਵਿੱਚ ਇੱਕ ਦੁਕਾਨ ਖੋਲ੍ਹੀ ਗਈ ਹੈ ਜਿਸ ਦਾ ਨਾਮ ਹੈ “ਇਮਾਨਦਾਰੀ ਦੀ ਦੁਕਾਨ” । ਇਸ ਦੁਕਾਨ ਚ ਕਾਪੀਆਂ ਪੈੱਨ ਤੇ ਹੋਰ ਜਰੂਰੀ ਸਟੇਸ਼ਨਰੀ ਦਾ ਸਮਾਨ ਰੱਖਿਆ ਗਿਆ ਹੈ, ਜਿਥੋਂ ਜਰੂਰਤ ਪੈਣ ਤੇ ਵਿਦਿਆਰਥੀ ਕਾਪੀ ਪੈੱਨ ਲੈ ਸਕਦੇ ਨੇ। ਇਸ ਦੁਕਾਨ ਦੀ ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਇਸ ਦਾ ਕੋਈ ਮਾਲਕ ਨਹੀਂ ਤੇ ਨਾ ਹੀ ਕੋਈ ਇਸ ਦੁਕਾਨ ਦਾ ਹਿਸਾਬ ਕਿਤਾਬ ਦੇਖਦਾ ਹੈ। ਇਸ ਦੁਕਾਨ ਚ ਦੋ ਡੱਬੇ ਰੱਖੇ ਗਏ ਨੇ ਇੱਕ ਡੱਬੇ ਦਾ ਨਾਮ ਹੈ ” ਮਨੀ ਬੌਕਸ” ਤੇ ਦੂਜੇ ਦਾ ਨਾਮ ਹੈ “ਸਲਿਪ ਬੌਕਸ” । #kalampunjabdi
ਅਗਰ ਕਿਸੇ ਵਿਦਿਆਰਥੀ ਨੂੰ ਕਾਪੀ ਜਾ ਪੈੱਨ ਦੀ ਲੋੜ ਪੈਂਦੀ ਹੈ ਤੇ ਉਸ ਕੋਲ ਪੈਸੇ ਹਨ ਤਾਂ ਉਹ ਦੁਕਾਨ ਤੇ ਜਾਂਦਾ ਹੈ ਤੇ ਮਨੀ ਬੌਕਸ ‘ਚ ਪੈਸੇ ਪਾ ਕਾਪੀ ਲੈ ਲੈਂਦਾ ਹੈ। ਅਗਰ ਉਸ ਵਕਤ ਵਿਦਿਆਰਥੀ ਕੋਲ ਪੈਸੇ ਨਹੀਂ ਹਨ ਤਾਂ ਉਹ ਦੂਜੇ ਬੌਕਸ ਸਲਿਪ ਬੌਕਸ ਦੀ ਵਰਤੋਂ ਕਰਦਾ। ਪੈਸੇ ਨਾਂ ਹੋਣ ਦੀ ਹਾਲਤ ਚ ਵਿਦਿਆਰਥੀ ਇੱਕ ਪਰਚੀ ਤੇ ਆਪਣਾ ਨਾਮ, ਕਲਾਸ ਤੇ ਰੋਲ ਨੰਬਰ ਲਿਖਕੇ ਉਸ ਪਰਚੀ ਨੂੰ ਸਲਿਪ ਬੌਕਸ ਚ ਪਾ ਦਿੰਦਾ ਹੈ ਤੇ ਅਗਲੇ ਦਿਨ ਪੈਸੇ ਲਿਆ ਕੇ ਪੈਸੇ ਮਨੀ ਬੌਕਸ ਚ ਪਾ ਦਿੰਦਾ ਹੈ ਤੇ ਸਲਿਪ ਬਾਕਸ ਚੋ ਆਪਣੀ ਪਰਚੀ ਕੱਢ ਕੇ ਪਾੜ ਦਿੰਦਾ ਹੈ। ਇਹ ਦੁਕਾਨ ਪੂਰੀ ਤਰ੍ਹਾਂ ਵਿਦਿਆਰਥੀਆਂ ਦੀ ਇਮਾਨਦਾਰੀ ਤੇ ਚੱਲਦੀ ਹੈ ਤੇ ਵਿਦਿਆਰਥੀ ਵੀ ਇਮਾਨਦਾਰੀ ਨਾਲ ਇਸਨੂੰ ਰਲ ਮਿਲ ਕੇ ਚਲਾ ਰਹੇ ਨੇ। ਇਸ ਉਪਰਾਲੇ ਜਰੀਏ ਵਿਦਿਆਰਥੀ ਇਮਾਨਦਾਰ ਬਣਨਾ ਸਿੱਖ ਰਹੇ ਨੇ। ਵਿਦਿਆਰਥੀਆਂ ਅੰਦਰ ਸਮਾਜ ਪ੍ਰਤੀ ਬਣਦੀ ਜ਼ਿੰਮੇਵਾਰੀ ਦਾ ਅਹਿਸਾਸ ਪੈਦਾ ਹੁੰਦਾ ਹੈ। ਅਜਿਹੇ ਉਪਰਾਲਿਆਂ ਦੀ ਹਰ ਸਕੂਲ ਚ ਜਰੂਰਤ ਹੈ। ਚੰਗੇ ਇੰਨਸਾਨ ਬਣਨ ਦੇ ਮੁਢਲੇ ਗੁਣ ਬੱਚਾ ਸਕੂਲ ਚੋ ਹੀ ਸਿੱਖਦਾ ਹੈ। ਇਸ ਉਪਰਾਲੇ ਲਈ ਰਾਜੇਵਾਲ ਦੇ ਇਸ ਸਕੂਲ ਦੀ ਪੂਰੀ ਟੀਮ ਨੂੰ ਸਲਾਮ ਤੇ ਉਮੀਦ ਹੈ ਭਵਿੱਖ ਚ ਅਜਿਹੇ ਸੋਹਣੇ ਹੋਰ ਵੀ ਉਪਰਾਲੇ ਸ਼ੁਰੂ ਹੋਣਗੇ।

ਜਗਮੀਤ ਸਿੰਘ ਹਠੂਰ